ارباب عشق

 

 ازل گون منشی ازل کتاب البلا یازدی

 

عالم ذر

گریز به شهادت حضرت ابوالفضل (ع)

.

مرحوم انور اردبیلی

.

ازل گون منشی ازل کتاب البلا یازدی

بلانی اوّله سالدی دالیجا للولا یازدی

.

اولوبدور مشتری فیض بلایه چهارده معصوم

بلاطومارینه هرتک تکی لفظ بلی یازدی

.

سوال اولدی کیم ایستور دین یولوندا بیر دیشی سینسون

قبلت کلمه سین فوراشریف انبیا یازدی

.

ندایتدی کیمون وارمیلی هنگام عبادتده

قلینجا باشدا ییرویرسون قبولین مرتضی یازدی

.

خطاب اولدی یانا درگاهی هانسوزدا رضایت وار

رضیت بالقضائک حضرت خیرالنسا یازدی

.

صداگلدی قاپون یانسا قابیرقوندا گرک سینسون

دوباره راضیم هردرده خاتون جزا یازدی

.

اولوب ابلاغ آجی زهری شیرین سوتک ایچن واردی

توکولسون طشته اکبادی آدینی مجتبی یازدی

.

اولوب تکلیف واردور بیرنفر یتمیش فداویرسون

منیمدوربوگوزل سوداغریب کربلا یازدی

.

ندایتدی گرکدور قیزلاروندا دستگیر اولسون

خوشام هر امروه دیلدن قتیل نینوا یازدی

.

امینم فاطمم واردی سکینم وار رقیّم وار

اسارت دفترین تکمیل ایدوبدی جابجا یازدی

.

یتوبدور سس بوپیماندا سنه یولداشدا لازمدی

تعهدنامه چوخ سنگینیدور کلک قضا یازدی

.

اسارت موقعینده اهل عیالون سرپرست ایستر

بوسوداده سنه غم خامه سی مشکل دوتا یازدی

.

حبیبیم ابتلا چوخدی شریکون اولماسا اولماز

صدا گلمز تک الدن منشی کار آشنا یازدی

.

گوروب تنهاحسینی گلدی زینب ال اله ویردی

شریک اولدوم حسینیمله بلاده ربنا یازدی

.

خلوص واشتیاقیله تعهد نامه مهر اولدی

قلم کرب وبلا دشتین محل ابتلا یازدی

.

اولوبدورهجرتین آتمیش بیری تاریخ عالمده

مورخلر حسینون آدینه مردخدا یازدی

.

چخوبدور کعبه دن میقات عشقه باغلادی احرام

منانی قویدی حسرت نینوا دشتین منا یازدی

.

اگر عالِم فساد ائتسه هامی عالَم فساد ایلر

شریحه ایلیون لعنت حسینه افترا یازدی

.

ئوزون نیروی فتوادن او ظالم بهره مند ائتدی

امام کون و امکانه اهانت برملا یازدی

.

جری ائتدی عراقون ماجراجو بی وفا خلقین

حسینون قتلنون فتواسینی آلدی طلا یازدی

.

گچوبدور اون گجه ماه عزادن اولدی عاشورا

باخوب صبحه اوصبحی عاشقان صبح صفا یازدی

.

اولوبدور تشنه لر جام بلانی ایچمگه تشنه

دوشوبدور زیندن هر کیم یره انّی فدا یازدی

.

حسین ئوز اوغلونا خلعت بیچوب گوندردی میدانه

شهادت نامیه اکبر ئوز آدین ابتدا یازدی

.

دالیجا قتلگاهه زینبون اوغلانلاری گئتدی

شریکه باخ شریکیله نجه عهده وفا یازدی

.

ایکی اوغلون فدا وئردی دیمه دی آدلارین بیر یول

مقام صبریده الحق ئوزون انگشت نما یازدی

.

خداوندا خداوندا نه قدرت واردی زینبده

کتاب عمرینه اللی بش ایل سلم و رضا یازدی

.

کچوم سوزدن گئدوب شهزاده قاسمده شهید اولدی

فلک طوی حجله سین برهم ائدوب ماتم سا یازدی

.

طویون تبریکی زرّین خطّیله اولسون گرک انشاء

قلم پیکان اولوب خط طلائی قان حنا یازدی

.

عروسی باخدی داماده دئدی بیر یاندیران کلمه

منی مستوفی محنت عجب بختی قرا یازدی

.

فرات اوستونده القصه بنی هاشم آیی باتدی

امامه سرگشاده عرضه سین صاحب لوا یازدی

.

یوزوم اوسته یخلدیم توپراقا ادرکنی یا مولا

یره هر یاره دن قانیم آخوب حمد و ثنا یازدی

.

نه حالیله آنام زهرا گلوب گوردی دیدی احسن

رضایت نامه سین گلدی علی المرتضی یازدی

.

قاپونداخدمتیم آزدور ولی سن گل رضایت ویر

دیسونلرنوکره مولابرات مرحبایازدی

.

سویا ویردیم آغیرقیمت ایکی قول بیرگوزوم گیتدی

بوخالی مشگه شام اهلی نقدری گوربلا یازدی

.

گیدنلرده گوزوم یوخدور گوزوم تک سنده دور سنده

دوشنده مشکله دردین سنه هرمبتلا یازدی

.

قالان بیر قانلوپرچمدی حسین جان گل ویروم تحویل

بوپرچمده مشیت خامه سی رمزعزا یازدی

.

علمدارون سسین آلدی حسین سسلندی یا زینب 

اسارت ناموزی میداندا قوم اشقیا یازدی

.

گیدوم میدانه آغلارسوز گلنده قدی خم گلسم

سوسوزلاره ابالفضلیم حدیث البکا یازدی

.

نجه گلدی نجه تاپدی عزیزین فاطمه بیلدی

ازلده سرسلامت اوغلونا غملی آنا یازدی

.

حسین سندی بیلون دشمن ایچینده آغلاما صبرایت

قدر کلکی بوماتمده منی اهل نوا یازدی

.

عمود آهن دگن باشی حسین آلدی دیزی اوسته

کتاب روزگاره بیر نچه بند اوخشاما یازدی

.

صفای گلشنیم قارداش حصار ایمنیم قارداش

مرکب گوز یاشی کیپریگ قلم اول مقتدا یازدی

.

بو عشقه بو مواساته آتامدا فخر ائدر قارداش

نه من مندن قاباق تحسینوی اهل کسا یازدی

.

الون گئتدی بلیم سندی علم یاتدی حسین ئولدی

سسوز مشون سسولار دردینه یاخشی دوا یازدی

.

الون اولسیدی دشمنلر حسینه ال چالانمازدی

بدندن هر الون دوشدی منه قطع الرجا یازدی

.

حریم دین یخلمشدی کسوک اللر ستون اولدی

یازانلار مشکل دینه سنی مشکل گشا یازدی

.

دوداقوندن ائدوب بوسه گوزوندن ئوپمرم اما

اجل حکمین جفا تیری گتوردی گور هارا یازدی

.

باجون زینب دوزر اما آنوندان ناگرانم من

اونا غم کاتبی دنیا بوئی واحسرتا یازدی

.

خیامه تک گئدوم قارداش و یا که اگلشوم بوردا

بو آز یولدا منه دشمنلریم چوخ چوخ جفا یازدی

.

ایاق اوسته دورا بُلمم الیمدن ده دوتان یوخدی

اولوب مأیوس هارا ئوز دردینی بو مبتلا یازدی