سينوون ياره سى گلمز سانا كيمسن يارالى
شاعر:مضطر اردبیلی
سينوون ياره سى گلمز سانا كيمسن يارالى
بويانان باشدان اياقه قانا كيمسن يارالى
قارداشيمسان نيه بس باجووى دينديرميوسن
كيم كسوب اللروى هيچ منه بيلديرميوسن
مينديرن يوخدى منى ناقيه مينديرميوسن
چكيلوبسن نيه بيزدن يانا كيمسن يارالى
باجى بيچاره گرك دردينى قارداشه ديه
مهربان قارداش اونون دردينه درمان ائليه
يوزى اوستنده ياتوبسان بله حاليله نيه
گوره زينب اورگى اودلانا كيمسن يارالى
يوخسا باشون بله ياتماقده دالدان كسيلوب
بله معلوم اولى باشون سنون عطشان كسيلوب
هانسى ميناده سوسوز سن كيمى قربان كسيلوب
چوخ غمون وار بو غمون بير يانا كيمسن يارالى
قورى تپراقلارين اوستونده قالوبدور بدنون
خس و خاشاك بيابان اولوبدور كفنون
نقدر ظلم ائدوب حقونده بو عدوان سنون
بير نفر حالووه يوخدور يانا كيمسن يارالى
سن حسينيم سن اگر تز منه دردون اله فاش
هانى بارماقون او انگشترون آخر هانى باش
كيم گوروبدور ائده لر جسمى بو نوعى متلاش
نيزه و خنجريلن دوغرانا كيمسن يارالى
بيرجه ديندير منى سن باغريمى قان ائتمه دانش
مندن اسراروى هچ وقتده نهان ائتمه دانش
گئدورم گئتمه ليه م چوخ نگران اولما دانش
گئده بلمم نگران بير يانا كيمسن يارالى
قورخوسان نعشوون اوستونده بو خواهر باش آچا
قويميوبلار قالا بو باجوه معجر باش آچا
قارداشى ئولدى گرك خواهر مضطر باش آچا
باش آچا باجى گرك باش يولا كيمسن يارالى
سن حسينيم سن اگر عرض ائليوم مطلبيمى
روزگار ايلدى تيره او ايشيق كوكبيمى
آلديلار معجر و گوشواره و چادر شبيمى
دوشموشم گور نجه حالدان حالا كيمسن يارالى
اولى چوخ يانديريجى اودلارين هر يرده كوزى
كوز اودون مثلى دى تحويل آلا هر قلب سوزى
"مضطر" اول سوز بودى اوخشار باجى قارداشى ئوزى
سينوون ياره سى گلمز سانا كيمسن يارالى